Act 11 | NAS | STEP | Enang tee Juꞌdeeainge Kumponing bakaang kara nkavaioꞌ taaravauꞌnung kara okovuri nkanukai eeꞌnoko ookara baitoarikoꞌninge Judiaꞌnupoonge.

Acts 11

Piitai Baꞌmarang Nauvuruꞌnaꞌ Kumponinge Juꞌdeeaing Biraankevuruꞌnaꞌkoo

1 Enang tee Juꞌdeeainge Kumponing bakaang kara nkavaioꞌ taaravauꞌnung kara okovuri nkanukai eeꞌnoko ookara baitoarikoꞌninge Judiaꞌnupoonge. 2 Teeꞌkoo Piita Jerusalemaꞌaape toroarioꞌ teinge dopaꞌ totoꞌkoo purimparikoꞌnavitue tuutunampauꞌ, aaꞌpaama, 3 “Daꞌ aming-koo teing ninka dopaꞌ napuꞌariaing ninka pava-koo bera nariꞌ taamanirieeng?” 4 Teka Piitai ookara kapooꞌ okoraꞌketa nkoaruꞌnaꞌ nauvurima sirakaꞌantavuuꞌ. 5 Aaꞌpuuꞌ, “Ning teke Joopaꞌnavuntuꞌkoo kunsimarama oꞌnoi niiꞌnaung-koo bereꞌmarara kapooꞌ pankaing baarong-pinaꞌ sivereꞌari paning-eta depeto siarako karenaumo kunkuꞌdoiꞌkoo biꞌari noone-pinaꞌ ooantuꞌ. Eeꞌnoko tee ning-anko siaruꞌ. 6 Bera tee-koo ookama kauꞌ karenaumonanka ooarantuꞌ, niiꞌning iirankesiꞌnanka, eeꞌnoko boruꞌnanka eeꞌnoko barennanka auviꞌau-kooning. 7 Eeꞌnoko ninge aurong taaravantuꞌ aaꞌmuko, ‘Piita, donkonira tavera maaꞌeai.’ 8 Teka ninge aaꞌpantuꞌ, ‘A, Ovoring, temuꞌketa koontoꞌ aing kapooꞌ eeꞌ oroꞌke ning karang komuaruuꞌnung, aiꞌ aing teing kuꞌmiꞌpoꞌning, orokoari otong niiꞌkoo Juꞌnupoong-koo.’ 9 Eeꞌnoko teie auronge napoꞌ kemuꞌkanaꞌ paning-eta karoma makuꞌmuma aaꞌpuuꞌ, ‘Aming kapooꞌ Kumponinge kiiroraaꞌantavuing dake kuꞌmiꞌpoꞌnung tampema pooreꞌeaukaꞌ.’ 10 Bera tee beemuꞌpinaꞌ nkoarioꞌ napoꞌ paning-aape ookutunung deto barampuuꞌ.

11 Eeꞌnoko napoꞌ tenang tee batei-koo beenaumo nantoong Sisariaꞌketa ning-anko botoaaruꞌning porouꞌ teꞌ teva-koo niiꞌ oꞌnorikoꞌnooꞌ. 12 Eeꞌnoko Tanuaang Meekunge ning teing ninka nariꞌ meriiꞌnaang botomuuꞌ tokoonaꞌ noruꞌmaravaꞌ. Eeꞌnoko aing niiꞌmaikororiꞌ ~narung-taa niꞌninka nariꞌ nanampiruꞌ bera teꞌ tee naning ning bokumuuꞌnung bakanava-koo tumariruꞌ. 13 Eeꞌnoko teie naumuruꞌ teeꞌ koosinung bakanava-koo pora tee-anko donkonuioꞌ oovuuꞌnaꞌ aaꞌpuma, ‘Joopaꞌaape botoraravai Saimoniꞌ, tee Piita tampaamaung boku-koo. 14 Teie eeꞌnarai sirakaꞌantaruuꞌnaang tee doorenang daꞌ eeꞌnoko dakanava-kooning nariꞌ domantariainaꞌkoong.’

15 “Teketa ninge kara tutumpanko tee Tanuaang Meekung tee teing-koo siaruꞌ teeꞌ niiꞌkoo tutuntomai nkoaruꞌnaꞌ nariꞌ. 16 Eeꞌnoko ninge norunoruꞌantuꞌ tee kara Ovoring bakaang eeꞌ minkuvuuꞌnung, ‘Jooni Minkinarai tee masikaꞌ tamung ntong-koo minkirurima meekaꞌantarurikoꞌ, teka diiꞌ teing Tanuaang Meekung ninka meekaꞌantarariaining.’ 17 Kumponinge tee, niiꞌke Ovoring Jiisuuꞌ niikaang domang-anta tero Pakoꞌpariꞌniiꞌ masikaꞌantavampirioꞌ tee bakaang Tanuaang Meekung niiꞌ amuruꞌnaꞌ aing avurioꞌ tasiꞌpamira ning arekeeꞌkoo ninka mosiiꞌmarapeuꞌ Kumponing bakaang pia totoꞌpansitaaꞌ?” 18 Tenang teinge tee taaravaara teing dooroomparira Kumponing pankaing-antavauꞌ aaꞌpaama, “Juꞌdeeaing doma tureroꞌpuringe Kumponinge bereꞌarira domampariiꞌnaang.”

Teing Jiisuuꞌ Siompaakoꞌning Tutung Miring Kiristianiꞌ Tampaaruꞌnaꞌ

19 Tenang tee Sitiveni tavaara mankiꞌ avuꞌantavaarioꞌ Karistooꞌ bakanavitu-koo niiꞌning avitoitoi mmariauꞌ akovitu otoromanairue bera aaꞌning-koo basiariruꞌ Ponisia-nameensiꞌ, Saiparasi-namuiꞌ eeꞌnoko Antiokoꞌnavuntuꞌ. Nka Kumponing bakaang kara Juꞌdeeaing-koo siraꞌpaavaꞌ biiꞌka Juꞌnupoong naing naueekoꞌ. 20 Teka teing-koo niiꞌning Saiparasi eeꞌnoko Sairini-nupoong-koo teketa mmariaama Antiokoꞌ berora teke siraꞌpauꞌ tee kara Ovoring Jiisuuꞌkoong oovuning-koo Kirikiꞌnavitu-koo. 21 Ovoringe teing aaꞌnaꞌ pakuvurikoꞌ. Eeꞌnoko karingai nantoonge masikaꞌantavaarima Ovoring-aape bereꞌarikoꞌ.

22 Teketa teinge dootuuꞌnupoonge Jerusalemaꞌ otorokoꞌninge taaravaara Banabasi Antiokoꞌaape botoauꞌ. 23 Bera Banabasi teꞌ basiarara Kumponing bakaang piaa teing-koo oovura dotuaruꞌ, eeꞌnoko tautauvuruꞌ teing ookara teeꞌ nariꞌ kakeꞌiiariri otoromaatooꞌnaang, Ovoring-koo pinkaꞌariri, avutevuꞌariaꞌ. 24 Aiꞌ tee tee naning tampara, Tanuaang Meekunge eeꞌnoko baitoi maantoꞌke. Eeꞌnoko teketa pankavitu bereꞌarira tapoꞌariruꞌ Ovoring-koo.

25 Teeꞌkoo Banabasi napoꞌ Taasus-aape beuꞌ Soolo besiꞌuma. 26 Eeꞌnoko oovura Antiokoꞌaape toroaretuꞌ. Eeꞌnoko namareꞌkoo ookutunamareꞌkoo teing mmauꞌ dootuuꞌnupoong teke otorokoꞌning nau-antavaarema nariꞌ otorouꞌ. Bera teka eeꞌnooꞌka Antiokoꞌnavuntuꞌkoo tutunaꞌ teing Karistooꞌ siompaakoꞌning Kiristianiꞌ tampaaruꞌ.

Antiokoꞌnung Dootuuꞌke Jerusalemaꞌnung Dootuuꞌ Pakuvuuꞌnaꞌ

27 Enang tee tee batei-koo niiꞌning nakaro-nupoong Kumponing bakaning Jerusalemaꞌketa depeto porouꞌ Antiokoꞌaape. 28 Eeꞌnoko narung teing-koong miring Akabas deto donkonura peera pankaing ookutunung kansiꞌkoo damaꞌke tavoꞌaravaing siraꞌpuuꞌ Tanuaang Meekunge nauvuioꞌ. Tee aung tee tavoꞌaruꞌnung damaꞌke tenang ovoꞌmaꞌ miring Kalaudias otokoꞌnang. 29 Eeꞌnoko teinge Karistooꞌ sionukai teeꞌ taaravaara teing biiꞌmaikororiꞌ Judiaꞌnupoong pakuaariiꞌnaang eeꞌ matauauꞌ: ookarai mooniꞌ biiꞌka makosinaꞌ naroꞌ oosiaavai teing paku-koo. 30 Bera oosiaara Banabasi eeꞌnoko Soolo botoaaresioꞌ Jerusalemaꞌ Karistooꞌkoonavitu-koo urantanuka-anko tavoꞌuretuꞌ.